الثقافة الجنسية

الثقافة الجنسية

الثقافة الجنسية 

 شوية ديال الثقافة العلمية الجنسية خاصة فإطار الموسم ديال الحبّ والزواج والعرّاسيات اللي غادي يبدا بعد رمضان.. (اللي كيحشم بزّاف وحالّ فيسبوك فشي ecran géant ينقّز للمنشور الموالي). أحد أكبر الاخطاء العلمية الشائعة اللي أدى لويلات تلو الويلات فعدد من المجتمعات من بينها ديالنا. غشاء البكارة ليس غشاء يغلّف يجب تمزيقه وليس غطاء يغطّي يجب ازالته وليس صمّام أمان يتم تمزيقه فحال باش كتحلّ قرعة ديال المونادا ديال الپلاستيك. غشاء البكارة مكيحيّدش أثناء العملية الجنسية الكاملة الاولى بل كيبقا عند المرأة حياتها كاملة تماما فحال الركبة ديالها ولا الاذن ديالها ولا داك الجلدة اللي كاينة بين الاصبع الاول والاصبع الثاني ديال الرجلين ديالها. السبب الوحيد اللي غادي نستعمل فيه كلمة غشاء البكارة فهاد الپوست هو حيتاش ماكين حتا شي كلمة اخرى فالقاموس العربي توافق كلمة hymen. أما هو فالحقيقة ليس غشاء ولا يوجد فقط عند "البكر" وبالتالي ماشي "غشاء ديال البكارة". غشاء البكارة هو نسيج من الجزء الخارجي ديال المهبل *نفسه*. بعبارة اخرى هو مدخل المهبل نفسه كيكون مزيّر فداك البلاصة (ماشي مسدود طبعا وإلا ماكانش غادي تكون البنت كتستعمل "نانا"). كيكون مزيّر كاثر من آثار التطور الجنيني البيولوجي ديال البنت. الفتحة تقدر تكون خلقيا صغيرة وتقدر تكون كبيرة (يعني تقنيا "بنت خلقات دون غشاء بكارة") وغالبا كتكون على شكل هلال وتقدر يكون عندها اشكال اخرى (شي قاسح شي رهيف شي مطاطي بزاف شي مطاطي اقل.. شي فيه تقيبات فحال الغربال.. اختلافات طبيعية فالجنس البشري فحال اللي شي عينو قهويين وشي عينو كوحل). الاهم هو أن هاديك البلاصة هي مطاطية وإلا ضغطتي عليها بصبعك نحو الجوانب كتتوسع وكتحلّ الطريق. ومع مرور الوقت يمكن داك البلاصة تعاود ترجع (بفعل المطاطية ديال داك النسيج) تماما فحال اللي كانت قبل. بكل بساطة... عمّرك شفتي قرعة ديال كوكا ديال البلاستيك كتحلّها وكترجع كيف كانت بعد مدة؟ لا! إذا كفى من مقارنة البكارة بشي حاجة كتتمزق مرّة وحدة بدون رجعة. ف"المرة اللولة" ماشي ضروري يوقع تمزق ديال اي نسيج وماشي ضروري يسيل الدم بالعكس بعض المرات غادي يسيل الدم فقط حيتاش الزوج الجديد ولا الشريك الجنسي ديال البنت مزروب وماعمّرو قلب فيوتوب كيفاش يدير ولا حتا هو قالولو انه "خاسّو يforcé" . فهاد الموسم ديال الحبّ والزواج القادم أدعو المجتمع ديال النگافات أنه باش يگلسو مع الزوجين يقولّيهوم: ـ استعملوا les lubrifiants intimes . كيتباعو فالصيدليات وغير الصيدليات. وخاس يولّي جزء لا يتجزء من الstarter pack ديال العرسان (وغيرهوم). خاس يولّي كيتّعطى فالعرس للزوجين تماما فحال داك الخنيشة ديال الحلوى اللي كتّعطى للضياف (غالبا كيتقام ارخص من الخناشي ديال الحلوى). ـ طوّل ما أمكن فالتعبير الجسدي عن الحب قبل ماتدوز ل"المرود والمكحلة". وماشي ضروري تطرا اي حاجة فالمرة الاولى. يقدر يكون داك الشي على مراحل. بالنسبة للمتدينين، ماكنعرفش شي شيخ افتى بحرمة استعمال أصبع أو اثنين من اجل "توسعة" مدخل المهبل لتفادي الالم.. (اللهم دوك الشيوخ اللي كيقولو كذلك أن المرأة خاسها تشوف العالم من ثقب واحد.. وهادوك ماغاديش ندّيو عليهوم). ـ تفرج ففيديوات من طرف خبراء / sexologues على يوتوب. العالم دخل مرحلة ثورة المعلومات وكلشي موجود. ـ الاستعمال ديال كلمة ولا فعل "تقب" لا يدل إلا على الجهل ديالك بعلم الاحياء التشريحي. هاد العملية هي عملية حميمية تشاركية ديالكوم بجوج وماشي عملية ديال "سيطرة الرجل الفحل على المراة والحاق الضرر بها". أصلا البنت إلا بغات يمكنليها تدير داك الشي دون الحاجة إليك بنفسها ولا بادوات كيدخلو من سبتة ومليلية. ترجّل. ـ بالنسبة للسيدات لا داعي للخوف ولا التوتر خلّيو التوتر والخوف للحظة الولادة (الله يسمحلينا من الواليدين) هي اللي فعلا ماعندك لاين من الألم (حاليا على الاقل)، أما "ليلة الدخلة" كاين ألف طريقة لجعلها غير ذي ألم يذكر بالنسبة لمعظم السيدات. ـ ماشي ضروري يسيل الدم. يعني نعم.. گاع دوك البنات ف"العروبية" اللي تزادو دون "غشاء بكارة" ولا داك النسيج ديالوم توسّع دون تمزّق أثناء العملية الجنسية الاولى ولا من قبل.. واللي ما خرّجوش "السروال" فليلة الدخلة وصفّاوها فالكوميسارية والطلاق والضرب والدراما.. تظلموا.. بسبب الجهل.